Leasú is déanaí: 5 Samhain 2012

CUR SÍOS AR ROINN NA GAEILGE

Fáilte go láithreán gréasáin Roinn na Gaeilge, Scoil na dTeangacha, na Litríochtaí agus na gCultúr.

Tairgeann an Roinn cúrsaí a thugann deis do mhic léinn iad féin a chur chun cinn i dteanga agus i gcultúr na Gaeilge. Tig leis an mac léinn cur lena (h)ábaltacht ar labhairt agus ar scríobh na teanga, i dteannta le heolas a fháil ar chultúr na Gaeilge féin.

Is duine den chomhluadar Gaelach é an mac léinn ó leagfaidh sé/sí cos thar thairseach Áras na Gaeilge, áit a labhraítear an Ghaeilge go gnáthúil.

Tá an Ollscoil seo suite ar bhruach na Gaeltachta agus bíonn cúrsaí Gaeltachta ar fáil mar áis foghlama do na mic léinn.Cuireann Oifig na Gaeilge Labhartha cúrsaí speisialta ar siúl faoi Cháisc agus sa samhradh do mhic léinn na Gaeilge in  Ionad an Acadaimh, An Cheathrú Rua.  

Tugtar deis agus cabhair ar leith sna cúrsaí seo d'fhochéimithe na Gaeilge feabhas a chur ar labhairt agus ar scríobh na teanga féin. Tá ionad agus áiseanna le haghaidh staidéir ar fáil san Áras seo freisin.

Glacann Roinn na Gaeilge leis go rachaidh mic léinn na Gaeilge chun na Gaeltachta agus go ndéanfaidh siad freastal ar na cúrsaí seo i gcaitheamh a dtréimhse san Ollscoil.  

An nuacht is déanaí 

10.10.12: CLÁR DEIRIDH DON CHOMHDHÁIL AR LITRÍOCHT AGUS CULTÚR NA GAEILGE 2012

Tá clár deiridh na Comhdhála ar Litríocht agus Cultúr na Gaeilge 2012 ar fáil  anseo. Reáchtálfar an Chomhdháil féin 12-13 Deireadh Fómhair in Áras na Gaeilge. Fiosrúcháin: fiona.depaornuigalway.ie.

30.08.12: CÉIMÍ DÁR gCUID AG MÚINEADH NA GAEILGE I gCEANADA

Chuaigh Eoin Ó Catháin (BA, 2011) i mbun oibre mar Theagascóir Gaeilge in Ollscoil Ottawa, Ceanada, an tseachtain seo. Bhronn Fondúireacht Ollscoil Éireann-Cheanada an scoláireacht ar Eoin, arb as Cill Mhíchíl i gContae an Chláir dó, chun bliain acadúil a chaitheamh i bpríomhchathair Cheanada.

Dúirt John Kelly, Stiúrthóir Feidhmiúcháin na Fondúireachta: ’Bhí an-áthas orainn Ollscoil Ottawa a chur san áireamh inár gClár Gaeilge i mbliana. Is í Ollscoil Ottawa an seachtú ollscoil Cheanadach a bhfuilimid i bpáirt léi agus táimid an-mhórálach go bhfuil Eoin á sheoladh ann mar an chéad Teagascóir Gaeilge’. 

Bronnadh scoláireacht eile chun an Ghaeilge a mhúineadh i gCeanada ar Conor Glynn (MA sa Nua-Ghaeilge, 2008).

Sa phictiúr tá an gradam á bhronnadh ar Eoin ag an Aire Ealaíon, Oidhreachta agus Gaeltachta, Jimmy Deenihan, TD.

27.08.12: GRADAM FULBRIGHT DO MHAC LÉINN Ó ROINN NA GAEILGE

Comhghaideas le Gearóid Ó Duinn ón MA sa Nua-Ghaeilge 2011-12 atá tosaithe ina phost nua mar Chúntóir Teagaisc Gaeilge in Ollscoil Villanova, Philadelphia, Pennsylvania. Bronnadh dámhachtain teagaisc sa Ghaeilge de chuid  Fulbright (FLTA) ar Ghearóid, arb as an gClais Mhór i gContae Phort Láirge dó, don bhliain acadúil 2012-13.

'Tá áthas orm go mbeidh mé ag múineadh na Gaeilge i Villanova, ollscoil atá fíor-aitheanta i réimse an Léinn Éireannaigh ar fud Mheiriceá Thuaidh', a dúirt Gearóid.  'Seo an chéad uair a bheidh teagascóir Fulbright le Gaeilge san Ollscoil seo agus tá sé ar intinn agam gach aon iarracht a dhéanamh cur leis an gclú sin agus mé thall. Táim ag súil go mór bualadh le daoine ó gach cearn den tír agus taithí a fháil ar an saol Meiriceánach.'

Is é Gearóid an duine is déanaí de mhic léinn agus de chéimithe na Roinne a ceapadh ina gCúntóirí Teagaisc le Gaeilge sna Stáit Aontaithe le blianta beaga anuas. Breis eolais anseo.

Sa phictiúr tá Gearóid agus Úna Halligan, Cathaoirleach an Choimisiúin Fulbright.

Cartlann Nuachta

• Séanadh
• Ráiteas Príobháideachta
• Cóipcheart
• Inrochtaineacht